Í september fækkaði tilkynntum kynferðisbrotum til lögreglunanar á höfuðborgarsvæðinu umtalsvert. Lögreglunni bárust sjö slíkar tilkynningar í september sem gerir um 70 prósent færri tilkynningar en bárust að meðaltali síðustu 12 mánuði á undan.
Þetta kemur fram í Afbrotatölfræði lögreglustjórans á höfuðborgarsvæðinu fyrir september 2018. Í skýrslunni eru teknar saman upplýsingar um helstu afbrot sem hafa verið tilkynnt til lögreglu. Fjallað er um þróunina á síðustu 13 mánuðum og tölur það sem af er ári bornar saman við sama tímabil síðustu þriggja ára.
Ekki hafa borist jafn fáar tilkynningar um kynferðisbrot á einum mánuði síðan í febrúar árið 2014. Það sem af er ári hafa borist 10 prósent færri tilkynningar um kynferðisbrot en bárust að meðaltali á sama tímabili síðastliðin þrjú ár.
