Bandarískir fréttamenn AP heimsóttu Ísafjörð á dögunum og fjölluðu um þá miklu aukningu sem orðið hefur á komu skemmtiferðaskipa þar um slóðir. Yfir hundrað skip komu í bæinn og til nágrannahafna síðastliðið sumar. Fram kom á vef Bæjarins Bestu á síðasta ári að fyrir áratug komu 24 skip til hafna Ísafjarðarbæjar. Sumarið 2016 voru skipakomurnar 82.
Fram kemur í umfjölun AP að þessi ævintýralega fjölgun geti í senn talist blessun og bölvun.
Rætt er við Guðmund Kristjánsson, hafnarstjóra á Ísafirði sem segir að fyrir 10 árum hafi í mesta lagi 12 skemmtiferðaskip komið í höfn í bænum. Nú er talan komin yfir hundrað og þegar er byrjað að taka niður bókanir fyrir næsta ár. Ófærð á veturna gerir það að verkum að í fjóra mánuði á ári að skipaumferðin takmarkast við fjóra mánuði á ári, og slíkt getur reynst bænum ofviða.
„Á hverjum morgni þegar bæjarbúar vakna og fara í vinnuna þá sjá þeir nýtt skip við bryggjuna. Einn þeirra sagði að skipin væru búin að breyta litla friðsæla heimabænum hans í „Manhattan eyju.“
Fram kemur að íbúar á Ísafirði hafi þurft að eiga við ágenga ferðamenn sem hafi verið á vappi við hús og garða í bænum.
Rætt er við Hauk Sigurðsson, íbúa í bænum. „Þegar ég bjó í gamla húsinu mínu þá kom það fyrir að ég vaknaði á morgnana og stóð inni í stofu á nærbuxunum, og þá voru ferðamenn fyrir utan að taka myndir.
„Þetta angrar mig ekki það mikið en ég myndi halda að einhverjum íbúum í bænum finnist þetta skrítið,“ segir Haukur en hann hefur nú þróað app fyrir snjallsíma sem ætlað er erlendum ferðamönnum sem koma í bæinn. „Ég er að vonast til þess að þeir fái þá einhverja tilfinningu fyrir því að þetta er alvöru samfélag sem býr hér, þetta er raunverulegur bær með fólki.“