Björg Guðjónsdóttir, íbúi á Akureyri, er orðin langþreytt á því að rassþungir unglingar hlammi sér á grindverkið hennar. Hún segir að þessir drundhjassar, rassþung og gildisvaxin ungmenni, skemmi grindverkið.
Frá þessu er greint á Nútímanum en vitnað er í færslu Bjargar á Facebook. Hún segist ýmislegt hafa reynt til að koma í veg fyrir að rassþungu börnin setjist á grindverkið. Þar á meðal hefur hún neglt nagla í grindverkið. Þeir bogna þó einungis undan þungum rössum.
„Gegnum árin hafa ungmenni verið rassþung á grindverkinu við hlið strætóskýli, það dugði ekki að setja nagla, þeir voru bara beygðir svo hægt væri að setjast, svo nú lét ég fjarlægja grindverkið, sem er næst skýlinu, enda marg búið að fá viðgerðir. Nú verður fróðlegt að vita, mun verða farið lengra til að geta setið á grindverkinu? Mig langaði til að setja gaddvírsstreng, en það má ekki vegna gæti valdið skaða á rassþungum,“ segir Björg og er ekki skemmt.