„Ég er reiður enn þann dag í dag að tækifærin til hamingju hafi verið tekin af henni af mönnum sem notfærðu sér hana til stundargamans. Sem að níddust á henni, jafnvel menn sem eru í góðum stöðum í dag, háttsettir í þjóðfélaginu. Þeir keyptu hana á þeim grundvelli að hún var eins og barn. Og þeir keyptu hana sem barn.“
Þetta sagði Sigursteinn Másson fyrrverandi fréttamaður en hann var viðmælandi í kvikmyndinni Lof mér að lifa sem sýnd var á RÚV í fyrri hluta myndarinnar sem sýnd var í fyrrakvöld. Jóhannes Kr. Kristjánsson er maðurinn á bak við heimildarmyndina sem framleidd er í tengslum við kvikmyndina Lof mér að falla.
Í þættinum tjáði Sigursteinn sig um Kristínu Gerði Guðmundsdóttur. Kvikmyndin Lof mér að falla er að hluta byggð á dagbókum Kristínar. Kristín framdi sjálfsmorð. Kristín var fíkill sem var þvinguð í vændi. Hún hafði verið edrú í sex ár þegar hún gafst upp og tók eigið líf. Afleiðingarnar af hinu hrottalega ofbeldi sem hún varð fyrir höfðu gríðarleg áhrif og hún jafnaði sig aldrei.
Sigursteinn bætir við á öðrum stað:
„Það sem ég er reiðastur yfir varðandi misnotkun á henni, er að þeir menn sem hún leitaði sáluhjálpar hjá og meðferðar, læknir og prestur, þeir misnotuðu sér aðstöðu sína gagnvart henni henni vegna þess hversu einlæg, hlý og aðlaðandi hún var. Meira að segja misnotuðu þeir hana þegar hún kom neyð sinni til þeirra að biðja um hjálp. Ég hefði aldrei trúað því fyrr en ég kynntist Kristínu Gerði hversu langt menn ganga í fýsnum sínum til að svala þeim, algjörlega án nokkurrar umhugsunar um afleiðingarnar.“
