Tveir ökumenn, sem lögreglan tók úr umferð í gær og í fyrradag vegna gruns um að þeir ækju undir áhrifum fíkniefna, reyndust vera með fíkniefni í fórum sínum. Í dagbók lögreglu segir að annar þeirra hafi verið með á annan tug gramma af kannabisefnum í bílnum en hinn nokkru minna af sömu efnum.
Að sögn lögreglu ók sá fyrrnefndi sviptur ökuréttindum. Niðurstöður sýnataka á lögreglustöð sýndu jákvæða svörun á fíkniefnaneyslu ökumannanna tveggja.
Fleiri ökumenn hafa verið teknir úr umferð á undanförnum dögum vegna gruns um vímuefnaakstur, þar af tveir sem grunaðir voru um að vera bæði undir áhrifum áfengis og fíkniefna. Þá hafa fáeinir ökumenn verið kærðir fyrir of hraðan akstur og skráningarnúmer fjarlægð afa óskoðuðum eða ótryggðum bifreiðum.