Gögnin sem Reykjavíkurborg gerði opinber um sundurliðun kostnaðar vegna braggans í Nauthólsvík stemma ekki við endanlegan kostnað borgarinnar þar sem það vantar alla reikninga sem voru greiddir vegna framkvæmdanna eftir 24 ágúst síðastliðinn.
Í reikningunum sem DV hefur undir höndum kemur í ljós að í yfirlitið vantar inn reikninga upp á milljónir og í tilvikum Arkibúllunnar og Eflu er virðisaukaskattur ekki tekinn með í reikninginn. Í þeim tilfellum bætist 24% við þá upphæð sem Reykjavíkurborg gerði opinbera, en borgin fær þann virðisaukaskatt endurgreiddann samkvæmt sérákvæði í lögum um virðisaukaskatt.
Í yfirliti Reykjavíkurborgar greiddi borgin Arkibúllunni 28,3 milljónir. Þegar reikningarnir eru skoðaðir og bornir saman við yfirlitið kemur í ljós að Reykjavíkurborg greiddi meira en 35 milljónir króna. Margrét Leifsdóttir, arkitekt hjá Arkibúllunni, sagði í samtali við Mbl í gær að reikningarnir væru laun til arkitektastofunnar og þar væri virðisaukaskatturinn innifalinn.
Sama er uppi á teningnum hjá verkfræðistofunni Eflu. Segir í yfirlitinu frá borginni að Reykjavíkurborg hafi greitt Eflu alls 26,88 milljónir en reikningarnir sýna að upphæðin er í kringum 33,3 milljónir. Hefur því bókhald borgarinnar birt kostnaðinn án virðisaukaskatts þar sem borgin fær hann endurgreiddann.
Samkvæmt yfirlitinu var heildarsumman við braggann fram í júlí á þessu ári rúmar 405 milljónir króna. Inni í þeirri tölu er ekki virðisaukaskattur á reikninga frá Eflu og Arkibúllunni. En það eru einu fyrirtækin sem ekki var settur virðisaukaskattur á heildarútgjöld þegar Reykjavíkurborg sendi frá sér reikningsyfirlitið yfir heildargreiðslur vegna verkefnsinsins, þar sem virðisaukaskattur af þjónustu verkfræðinga og arkitekta er endurgreiddur. Inni í yfirlitið vantar einnig reikninga upp á milljónir sem voru greiddir verktökum eftir að yfirlitið var sett saman. Um er að ræða reikninga frá því í lok ágúst og september. Nemur upphæðin sem vantar inn í yfirlit Reykjavíkurborgar því mörgum tugum milljóna.
DV hefur reikningana undir höndum og mun í dag og næstu daga birta fréttir upp úr þeim.