Brynjar Níelsson, þingmaður Sjálfstæðisflokksins, skýtur á Pírata og sérstaklega á Þórhildi Sunnu Ævarsdóttur, þingmann Pírata, í stöðufærslu á Facebook. „Píratar eru engum líkir. Þeirra helsti lögspekingur og mannréttindafrömuður var í Silfrinu í morgun að ræða Braggamálið. Þar upplýsti hún okkur fávísu um að innri endurskoðun borgarinnar væri nú bara eins og Ríkisendurskoðun og því þurfi nú ekkert að fá utanaðkomandi til að rannsaka málið. Hægt væri að kaupa þetta ef Ríkisendurskoðun væri á vegum framkvæmdavaldsins og starfaði við hlið forsætisráðherra í stjórnarráðinu við Lækjargötu,“ segir Brynjar.
Hann telur þetta merki um tvískinnung. „Svo bað Píratinn okkur um að bíða eftir niðurstöðu innra eftirlitsins. Sitthvað er Braggamálið eða Bragamálið í hugum Pírata. Þá þurfti nú ekki að bíða niðurstöðu rannsókna áður en dómar voru kveðnir upp. Ekki frekar en þegar samþingmenn voru vændir um auðgunarbrot vegna aksturs,“ segir Brynjar.
Hann segir að ekki þurfi að bíða eftir niðurstöðu innra eftirlits til að gagnrýna framkvæmdirnar. „Nú geta verið ýmsar skýringar á framúrkeyrslu við framkvæmdir, jafnvel eðlilegar. Hvað sem því líður þá liggur nú þegar fyrir ótrúleg lausatök við stjórnun borgarinnar. Enginn getur svarað nokkru þótt liggi fyrir fundargerðir með athugasemdum. Það þarf ekki að bíða niðurstöðu innra eftirlits til að gagnrýna það,“ segir Brynjar.