„Ég hata líka miðaldra karlmenn.“ Þetta segir Björn Leví Gunnarsson, þingmaður Pírata, í Pírataspjallinu en tilefnið er að Karl Jónatan Kárason deilir þar orðum Unu Hildardóttur, varaþingmanns Vinstri grænna. Hún sagði í ársbyrjun 2017 á Twitter: „Ég hata miðaldra karlmenn“. Af orðum Karls að dæma þá vísar hann líklegast til máls Kristins Sigurjónssonar sem var nýverið rekinn úr starfi sínu sem lektor við HR vegna ummæla um konur. Kristins sagðist meðal annars ekki vilja vinna með konum.
Björn Leví segir í samtali við DV að hann teljist nú líklegast miðaldra karlmaður sjálfur og ekki hati hann sjálfan sig. „Hugtakið „miðaldra karl“ lýsir ákveðnum aðstöðumun, almennt séð. Þetta er ekki sagt sem alhæfing niður á einstaklinga, heldur beint að staðalímyndinni um miðaldra karl í forréttindastöðu. Það eru fjöldamargir, og mun fleiri, miðaldra karlar sem eru ekki í þeirri forréttindastöðu. Auðvitað er það ósanngjarnt gagnvart þeim að sá skilningur sem þessi notkun á hugtakinu „miðaldra karl“, falli undir meirihluta karla á þessum aldri sem hugtakið í orðanna hljóðan virðist beinast að. Sem einstaklingur sem er svona að detta inn í þennan hóp þá finnst mér það hjálpa til þess að gera greinarmun á þessum mun á bókstaflegu merkingu orðanna og skilningnum sem er lagður í hugtakið. Hata ég þá sjálfan mig? Nei, ég hata þá sem falla undir staðalímyndina,“ segir Björn.
Ég hata miðaldra karlmenn
— Una Hildardóttir (@unaballuna) January 13, 2017
Hann segir að markmið sitt hafi verið að benda á þennan merkingarmun. „Þeir sem gagnrýna þessa orðanotkun einblína yfirleitt á bókstaflegu merkingu orðanna en hunsa skilgreiningu hugtaksins. Ég er að, með því að segja þetta svona, að minna á merkingarmuninn. Það er mjög ósanngjarnt að gagnrýni hunsi algerlega aðrar merkingar orðanna. Það var að hluta til ætlunin. Venjulega útskýri ég hvaða merkingu orðanna ég meina. Ég sleppti því viljandi þarna út af þeirri stöðu sem ég er í, nokkurn vegin miðaldra karl í forréttindastöðu sem fullt af fólki hefur ágætis ástæðu til þess að hatast út í. Og hins vegar að sýna að það eru ekki bara konur sem hata miðaldra karla,“ segir Björn.
Hann segist ekki vita nákvæmlega hvað Una hafi meint með orðum sínum en ætli að hún hafi meint það sama: „Að því sögðu þá veit ég ekki hvora merkinguna Una lagði í það sem hún sagði, ég giska á sömu og ég túlkaði. Það er afar sjaldgæft ef til yfirleitt að einhver hati alla miðaldra karla niður á hvern einstakling. Þess vegna er svo fáránlegt að ætla einhverjum þá merkingu í tjáningunni „ég hata miðaldra karla“. Að túlka meininguna niður á einstaklinga er bara dæmi um vandamálið sem þau orð lýsa.“