Þórður Snær Júlíusson, ritstjóri Kjarnans, svarar Ásmundi Friðrikssyni, þingmanns Sjálfstæðisflokksins, um einelti í garð hans í pistli sem birtist á vef Kjarnans í morgun. Ásmundur sakaði Kjarnann, Stundina og RÚV um einelti í kjölfar umfjöllunar um ummæli hans á Alþingi í vikunni þegar hann sagði SS-sveit, sveit sérfræðinga að sunnan, alltaf koma í veg fyrir að eitthvað gerist á Vestfjörðum. Sendi hann einnig Pírötum tóninn í tengslum við sömu ummæli og sagði umfjöllunina vera runna undan rifjum þeirra. Ásmundur sagði á Alþingi og í viðtali á Bylgjunni að hann hefði mismælt sig og upplifði að Kjarninn og RÚV legðu sig í einelti.
Sjá einnig: Ásmundur þurfti að leita sér hjálpar vegna Stundarinnar
Þórður hafnar því alfarið að Ásmundur sé lagður í einelti og bendir á skilgreiningu eineltis sem ofbeldis sem einn eða fleiri ráðast að einum og beita hann ofbeldi yfir lengri tíma. Þórður segir að ummæli Ásmundar hafi verið fréttnæm fyrir tvennar sakir:
„Í fyrsta lagi vegna þess að Ásmundur ásakaði óskilgreindan hóp um að standa í vegi fyrir framförum á ákveðnum landshluta. Í öðru lagi vegna þess að þau voru klaufaleg og bjuggu til vafasöm hugrenningatengsl, vegna þess að SS-sveitir eru sögulegar drápssveitir nasista.“
Bendir Þórður á að það hafi verið tekið sérstaklega fram að Ásmundur hafi ekki átt við SS-sveitir nasista. „En Ásmundur skautar yfir þetta í eigin fórnarlambavæðingu. Það að fjölmiðill segi frétt af málflutningi þingmanns í pontu Alþingis er bara einelti að hans mati. Það er ekki honum að kenna hvað hann segir, heldur þeim sem segja frá því.“
Varðandi fyrri fréttir af honum segir Þórður að málflutningur Ásmundar bendi til þess að hann hafi ekki skilning á tilgangi fjölmiðla, vísar Þórður þá sérstaklega í fjölmiðlaumfjöllun um akstursgreiðslur þingmanna.
„Þessir menn eru ekki fórnarlömb og það er móðgun við þá sem raunverulega verða fyrir einelti að kalla umfjöllun fjölmiðla um orð og gjörðir stjórnmálamanns slíkt.
Við Ásmund Friðriksson er einungis þetta að segja: þeir sem bjóða sig fram til að gegna opinberum störfum verða að þola umræðu og umfjöllun um störf þeirra. Það er ekki einelti heldur aðhald.“