Vigdís Hauksdóttir, borgarfulltrúi Miðflokksins, segir að umræðan í tengslum við #MeToo sé að færast út í öfgar og að margir upplifi að þeir megi ekkert. Í viðtali í Viðskiptablaðinu í dag segir Vigdís að hún geti ekki hugsað sér að daður hverfi úr íslensku samfélagi en það eigi ekki heima á vinnustöðum, til þess séu kvöldin.
„Ég myndi vilja sjá meiri varkárni í þessari MeToo umræðu, en við Íslendingar erum svolítið í ökkla eða eyra með allt saman og öfganna á milli,“ segir Vigdís. Hún tekur skýrt fram að hún sé á móti öllu ofbeldi, hvort sem það er kynferðisofbeldi, andlegt ofbeldi, líkamlegt eða áreitni af hverju tagi, en umræðan sé að færast út í öfgar: „Ég get nefnilega ekki á nokkurn hátt hugsað mér að daður og skemmtilegheit hverfi alveg úr íslensku samfélagi, því það er nú einu sinni þannig að fólk vill kynnast. En mér finnst þessi umræða vera að færast svo mikið út í öfgar, svo línan þarna á milli er að verða óskýr og margir upplifa að ekkert megi. Auðvitað á daður ekki að eiga sér stað á vinnustað, það á að nota kvöldin til þess.“
Dregur hún í efa að ferlar innan kerfisins og jafnréttisstefnur stofnana og fyrirtækja virki sem skyldi: „Þetta er nefnilega komið á þann stað núna að hægt er að svifta karlmenn mannorðinu jafnhratt og að smella fingri, einungis með því að setja út á netið einhverjar ásakanir og þá á maðurinn erfitt með að verjast, það er í raun ekki nokkur leið fyrir hann. Ég vona og trúi að þessi umræða eigi eftir að ná jafnvægi og ég vildi óska að allar umkvartanir gætu farið lögformlega leið.“