Bandaríski leikarinn Christian Bale hefur stundum gengið í gegnum ótrúlega hluti fyrir hlutverk sín í kvikmyndum.
Margir muna eflaust eftir myndinni The Machinist frá árinu 2004 þar sem leikarinn vó einungis um 50 kíló. Bale bætti heldur betur á sig fyrir nýjasta hlutverk sitt í myndinni Vice sem frumsýnd verður um jólin. Bale leikur þar fyrrverandi varaforseta Bandaríkjanna, Dick Cheney.
Bale bætti á sig rúmum tuttugu kílóum fyrir myndina og mætti kannski færa rök fyrir því að fáir leikarar hafi gengið í gegnum jafn miklar öfgar á ferli sínum og Bale. Hann var til að mynda í svakalegu formi í The Dark Knight-þríleiknum og í myndinni American Psycho sem margir muna eftir.
Fyrir myndina The Machinist, þar sem Bale var mjög ólíkur sjálfum sér, léttist hann um 30 kíló. Gera má ráð fyrir að leikarinn hafi bætt á sig 70-80 kílóum milli þessara tveggja mynda, The Machinist árið 2004 og Vice árið 2018.
Myndin verður sem fyrr segir frumsýnd um jólin en hún segir frá ferli Dicks Cheney sem var varaforseti Bandaríkjanna í forsetatíð George W. Bush. Sam Rockwell leikur Bush í myndinni en auk þeirra tveggja fara Steve Carell og Amy Adams með hlutverk í myndinni.