Svo óvenjulega vildi til á Alþingi fyrr í dag að þingmaður sem átti að fara upp í pontu fannst ekki. Því þurfti fundarstjóri, Jón Þór Ólafsson Pírati, að standa í ríflega mínútu í pontu meðan kannað var hvort þingmaðurinn kæmi í leitirnar. Það var Ásmundur Friðriksson, þingmaður Sjálfstæðisflokksins, sem lét sig hverfa.
Sjá einnig: Ásmundur þurfti að leita sér hjálpar vegna Stundarinnar: „Ég er mjög viðkvæmur fyrir því“
„Reynt er að hafa upp á þingmanninum til að koma í andsvör. Við bíðum átekta […] Ekki virðist unnt að veita þingmanninum, Sigurði Páli, að hann færi andsvör, því Ásmundur hefur yfirgefið svæðið,“ sagði Jón Þór. Andrés Ingi Jónsson, þingmaður VG, deilir myndbandi af þessu á Twitter og skrifar: „Í dag náði @jonthorolafsson þeim áfanga að týna þingmanni.“
Mikið hefur gengið á hjá Ásmundi undanfarið en DV greindi frá því fyrr í dag að hann teldi að hann væri lagður í einelti af Stundinni, Kjarnanum og RÚV. Hann lét þessi orð falla í Bítinu á Bylgjunni í morgun. Tilefnið er að Ásmundur sagði í fyrradag að „SS-menn“ að sunnan kæmu í veg fyrir framfarir á Vestfjörðum. Ásmundur sagði:
„Það leggjast bara þyngsli yfir mann og þetta er bara mjög erfitt. Fjölskyldan, eiginkonan og börnin og bræður mínir og nánustu ættingjar taka þetta mjög nærri sér.“
Ásmundur greindi einnig frá því að hann hefði þurft að leita sér aðstoðar vegna umfjöllunar þessara þriggja miðla. Ekki náðist í Ásmundi við vinnslu fyrri fréttar DV og því ekki vitað í hverju aðstoðin er nákvæmlega fólgin, hvort það sé sálfræðingur, prestur eða góður vinur.
Hér fyrir neðan má sjá myndskeiðið þegar leitað er að Ásmundi:
Í dag náði @jonthorolafsson þeim áfanga að týna þingmanni. pic.twitter.com/YvIrPvYnN3
— Andrés Ingi (@andresingi) October 11, 2018