Framboðsfrestur til leiðtogakjörs Sjálfstæðismanna fyrir komandi borgarstjórnarkosningar rennur út á morgun. Aðeins tveir hafa staðfest þátttöku til þessa, borgarfulltrúarnir Kjartan Magnússon og Áslaug Friðriksdóttir. Björn Jón Bragason hefur fimlega varist frétta og Vala Pálsdóttir, formaður Landssambands Sjálfstæðiskvenna, segist liggja undir feldi, í Morgunblaðinu í dag.
Nú hefur hagfræðingurinn Ólafur Arnarson bæst í hóp áhugasamra en óákveðinna. Á vef Eiríks Jónssonar er haft eftir Ólafi að hann íhugi alvarlega að mæta fjölmörgum áskorunum. Ólafur staðfesti þetta við Eyjuna í dag:
„Já ég er kominn undir feldinn fræga. Ég hef fengið nokkrar áskoranir og það heillar svolítið að fara fram. En þetta er stór ákvörðun, með svona stuttum fyrirvara. Ég þarf að ræða þetta við fjölskyldu mína auðvitað, en ég er alvarlega að velta þessu fyrir mér. Það eru líka svo mörg verkefni aðkallandi hjá borginni, það má gagnrýna margt hvernig haldið hefur verið á málum þar. Nú þarf ég að meta hvort ég sé rétti maðurinn til að leggja hönd á plóg,“
segir Ólafur, en frestur til að skila inn framboði rennur út á morgun klukkan 16.