Eyþór Arnalds einn eigandi Morgunblaðsins hefur ákveðið að bjóða sig fram til að leiða lista Sjálfstæðisflokksins í borginni. Frá þessu greinir Eyþór á Facebook-síðu sinni. Síðast var Eyþór í fréttum fyrir að hafa keypt stóran hlut í Morgunblaðinu. Þetta er í annað sinn á innan við tveimur árum sem fyrrverandi pólitíkusar tengdir Morgunblaðinu hella sér aftur út í stjórnmál, en annar Sjálfstæðismaður, Davíð Oddsson bauð sig fram til forseta og tapaði fyrir Guðna í júní 2016. Eyþór telur upp nokkrar ástæður fyrir því af hverju hann ætli í framboð. Hann segir á Facebook:
„Það er erfitt fyrir ungt fólk að eignast fyrstu íbúð í Reykjavík. Framboð á húsnæði er takmarkað og þess vegna er verðið hátt. Þétting byggðar á einstökum reitum hefur í raun skilað sér í hærra verði og dreifðari byggð á höfuðborgarsvæðinu. Raunfjölgun íbúða er lítil sem engin þegar tekið er tilliti til útleigu til ferðamanna.“
Þá segir Eyþór að lestrarkunnáttu hafi hrakað og samgöngumál séu í ólestri. Þá sé stjórnkerfið dýrt í rekstri.
„Borgarlína munu auka á vandann með enn meiri þrengslum í gatnakerfinu. Reykjavík á að vera í fararbroddi í nútímalegum samgöngum en festast ekki í dýrum og þunglamalegum lausnum. Þrengingarnar hafa nú þegar búið til kransæðastíflu í gatnakerfi borgarinnar,“ segir Eyþór og bætir við á öðrum stað:
„Ég hef einlægan áhuga á að vinna fyrir fólkið sem býr í borginni við sundin. Þess vegna hef ég ákveðið að gefa kost á mér til að leiða lista Sjálfstæðisflokksins í Reykjavík. Ef þú ert sammála því að við getum gert betur trúi ég að við getum átt samleið í að bæta borgina okkar allra.“