Alma Geirdal, ljósmyndari og uppistandari, greindist með brjóstakrabbamein í október síðastliðnum. Hún fór í stóra aðgerð í kjölfarið og er nýbyrjuð í lyfjameðferð sem mun standa fram yfir næsta sumar. Eins og margir aðrir sem veikjast alvarlega þarf Alma að glíma við fjárhagserfiðleika á sama tíma og hún glímir við hin erfiðu veikindi. Um þetta skrifaði Alma stutta FB-færslu til vina sinna nýlega:
Elsku yndislegu vinir og ættingjar, þar sem ég er að ganga í gegnum þessi erfiðu veikindi og mjög erfiðu lyfjameðferð get ég ekkert unnið og tekjur mínar því afar litlar. Því leita ég til ykkar. Allt hjálpar, hver króna.
Í stuttu spjalli við DV segir Alma, sem á þrjú börn, 19 ára stúlku og drengi sem eru 10 og 15 ára, að hún hafi orðið fyrir gríðarlegu tekjutapi þar sem enginn möguleiki sé á því að vinna með fram meðferðinni. Þá hefur hún þurft að bera háan lyfjakostnað og ýmsan annan kostnað vegna veikindanna.
Aðspurð segir Alma að meira þyrfti að gera fyrir fólk með alvarlega sjúkdóma til að bæta því upp tekjutap og kostnað: „Hafi maður einhverjar tekjur er ekki hægt að sækja um neina fjárhagsaðstoð nema bankalán sem er ekki á allra færi.“
Hins vegar ber hún heilbrigðiskerfinu og þjónustu þess við krabbameinssjúklinga vel söguna: „Það er gríðarlega vel hugsað um krabbameinssjúka og ég er þakklát fyrir það, það er mjög vel haldð utan um meðferðina sem ég gengst undir.“
Þrátt fyrir hina miklu erfiðleika sem Alma er að ganga í gegnum núna horfir hún björtum augum fram á veginn og batavonir hennar eru góðar: „Ég ætla að sigra þennan fjanda og koma sterkari til baka.“
Þeim sem hafa tök á að styrkja Ölmu í erfiðleikum hennar núna er bent á reikningsupplýsingarnar hér að neðan. Margt smátt gerir eitt stórt og það munar um hvert framlag þó að lítið sé:
0140-26-064210 kl. 060979-3759