Sævar Helgi Bragason‏, stjörnufræðikennari og vísindamiðlari, skýtur föstum skotum á líkamsræktarstöðina Reebok fitness á Twitter-síðu sinni. Ástæða þess er „nýjung“ sem Reebok fitness kynnt í gær, „infrarauði hitinn“, eða einfaldlega innrauður hiti.

Um er að ræða tvo hóptímasali þar sem þessi hiti ku leika við viðskiptavini. „Infrarauði hitinn er í tveimur hóptímasölum, sem hafa vakið mikla ánægju meðal viðskiptavina okkar. Það sem innfrarauður hiti hefur fram yfir annað er með því að hita líkamann upp innan frá eykst teygjanleiki bandvefjarins svokallaða sem leiðir til aukins hreyfanleika,“ segir á vef Reebok Fitness.

Þar segir enn fremur að þessi hiti hafi styrkjandi áhrif á ónæmiskerfið. „Loftið er talið heilnæmara fyrir þá sem viðkvæmir eru og er talið að þessi hitun hafi styrkjandi áhrif á ónæmiskerfi. Infrarauðu geislarnir hreinsandi áhrif þar sem þeir ýta undir efnaskipti og auka framleiðslu á svita. Það að stunda hlýtt jóga eykur vellíðan í líkamanum á eftir,“ segir á vef Reebok.

Sævar segir þetta einfaldlega rugl og skýrir á mannamáli: „Magnað. Vefir líkamans eru víst gegnsæir fyrir innrauðum geislum (hita) svo þér hitnar innan frá. Hafið þið einmitt ekki tekið eftir því hvernig sólin hitar fyrst beinin, svo húðina? Reebok fitness í ruglinu.“