Kanadískur karlmaður, Joshua Boyle, er í haldi lögreglu vegna gruns um kynferðisbrot og fjölmörg önnur brot. Joshua komst í heimsfréttirnar á síðasta ári þegar honum og fjölskyldu hans, eiginkonu og þremur börnum, var sleppt úr haldi Talíbana í Pakistan.
Fjölskyldan var á bakpokaferðalagi í Afganistan árið 2012 þegar vopnaðir einstaklingar rændu fjölskyldunni og héldu henni fanginni næstu fimm árin. Það var í október síðastliðinum að fjölskyldunni var sleppt úr haldi og kom hún til Kanada skömmu síðar.
Að því er AP-fréttastofan greinir frá hefur Boyle verið kærður fyrir fjölmörg brot, þar á meðal kynferðisbrot en einnig fyrir líkamsárás og frelsissviptingu. Eric Granger, verjandi hans, segir að hann sé í haldi lögreglu. Hann sé álitinn saklaus uns sekt sannast og bendir Eric á að skjólstæðingur sinn hafi aldrei komist í kast við lögin.
Eiginkona Boyle, Caitlan Coleman, segir í orðsendingu til Toronto Star að eiginmaður hennar hafi átt erfitt uppdráttar upp á síðkastið, sem rekja megi beint til þeirrar vítisvistar sem dvölin í Afganistan og Pakistan var. Joshua sagði við komuna til Kanada í október síðastliðnum að eiginkonu hans hafi verið nauðgað og barn þeirra drepið. Hún gat ekki tjáð sig um þær ásakanir sem málið nú snýst um. „En augljóslega er hann ábyrgur gjörða sinna.“