Gabríela Sif Beck eða Mia Flawless er formaður rollerderby-félags Íslands en sú hjólaskautaíþrótt er Íslendingum ekki að góðu kunn. Gabríela lýsir íþróttinni sem „harðri contact-íþrótt“ sem fer fram á sporöskjulaga braut. Í hvoru liði eru fimm leikmenn inni á í einu og fjórir af þeim eru svokallaðir blokkarar sem spila vörn en aðeins einn frammi sem sér um stigaskorunina. Sá er kallaður djammari. Fyrir hvern blokkara sem djammarinn kemst fram hjá fær hann eitt stig.
Á Íslandi eru um 30 rollerderby-iðkendur og flestir konur. Af þeim eru 20 í landsliðinu sem heldur nú á heimsmeistaramótið í fyrsta skipti en mótið verður haldið í Manchester á Englandi og hefst 1. febrúar. Alls eru 26 manns í teyminu sem fer út. Ísland spilar gegn Kostaríku og Team Indigenous (lið innfæddra Bandaríkjamanna) í riðlakeppninni. „Ég verð ánægður ef við verðum einhvers staðar um miðbikið,“ segir landsliðsþjálfarinn, Snorri Emilsson, sem kallar sig Flaming Moe.
Félagið var stofnað árið 2011 af íslenskum konum sem höfðu kynnst íþróttinni úti í Bandaríkjunum. Gabríela segir: „Til að byrja með vissu þær ekkert hvað þær voru að gera. Voru til dæmis á línuskautum en ekki hjólaskautum og spiluðu í bílakjöllurum.“ Nú æfa þær í Kaplakrika í Hafnarfirði.
Það verður seint sagt að iðkendur íþróttarinnar taki sig sjálfa mjög alvarlega. Allir nota þeir viðurnefni á borð við Bitchblade, Grim Creeper og Top Gunn-ur. Merki íslenska liðsins er lukkutröll með hár undir höndum og því hófu landsliðsmennirnir að safna hári í handarkrikunum í fyrrahaust í tilefni heimsmeistaramótsins. DV óskar þeim góðs gengis.