Þann 9. janúar fannst fjögurra manna fjölskylda látin á heimili fjölskyldunnar í Bjärred á Skáni í Svíþjóð. Lögreglan sagði fljótt að ekki léki grunur á að brotist hefði verið einn á heimilið og fólkið myrt en vildi ekki skýra nánar frá málavöxtum að sinni. Fyrir helgi skýrði lögreglan síðan nánar frá þessu hörmulega máli.
Aftonbladet segir að samkvæmt upplýsingum frá lögreglunni hafi lögreglan fundið bréf frá foreldrunum, einhverskonar kveðjubréf, þar sem fram kemur að þau hafi í sameiningu ákveðið að ráða dætrum sínum, sem voru 11 og 14 ára, bana og síðan taka eigin líf.
Á heimasíðu lögreglunnar kemur fram að foreldrarnir hafi skýrt frá ákvörðun sinni í bréfinu og sagt að þetta hafi þau ákveðið þar sem stúlkurnar hafi ekki búið við nein lífsgæði eða átt sér neina framtíð vegna sjúkdóma sem hrjáðu þær. Báðir foreldrarnir skrifuðu undir bréfið.
Lögreglan vinnur enn að rannsókn málsins en hefur ekkert látið uppi um hvað var að stúlkunum. Vitað er að stúlkurnar fengu heimakennslu árum saman af læknisfræðilegum ástæðum.
Rúmlega 50 ættingjar og vinir fjölskyldunnar hafa verið yfirheyrði og lögreglan hefur gert umfangsmiklar rannsóknir á heimili fjölskyldunnar. Lögreglan segir að enn liggi ekki fyrir hvernig fjölskyldan dó en vonast sé eftir að svar við því fáist þegar niðurstöður krufninga og tæknirannsókna liggja fyrir.