Öflug sprenging varð við lögreglustöð í Rosengård hverfinu í Malmö í Svíþjóð um klukkan 21 í gærkvöldi. Töluvert eignatjón varð. Tveir ungir menn voru handteknir í nótt, grunaðir um að standa á bak við sprengjutilræðið.
Sprengingin var mjög öflug og heyrðist víða um borgina. Lögreglan hefur ekki enn skýrt frá hvernig sprengja var sprengd en hún var sprengd á bílastæði lögreglustöðvarinnar. Fjöldi bíla skemmdist en fólk slapp ómeitt frá árásinni. Þeir handteknu eru um tvítugt. Rickard Lundqvist, lögreglustjóri í Malmö, segir að árásinni hafi verið beint gegn lögreglunni og starfi henar.
Þetta er þriðja sprengutilræðið við sænska lögreglustöð á skömmum tíma. Í október sprakk öflug sprengja við lögreglustöð í Helsingborg. Mikið eignatjón varð en enginn meiddist. Í desember var lögreglubíll sprengdur þar sem honum var lagt fyrir utan lögreglustöð í Malmö. 22 ára karlmaður var handtekinn vegna málsins.