Litlu mátti muna að mjög illa færi þegar Bryan Maess, Christopher McMahon og Roni Durham voru við veiðar í litlum báti skammt frá ósum Columbia-árinnar í Oregon í Bandaríkjunum þann 12. ágúst síðastliðinn.
Eins og meðfylgjandi myndband ber með sér skall stærri hraðbátur á báti þeirra á miklum hraða og áttu þremenningarnir fótum sínum fjör að launa. Þeim tókst að henda sér frá borði en ljóst er að sekúndubrotum munaði að ekki færi verr.
Á myndbandinu sést þegar eigandi smábátsins, Bryan Maess, reyndi að veifa skipstjóra hraðbátsins þegar ljóst var í hvað stefndi. Það gekk ekki eftir og varð harður árekstur í kjölfarið.
Nú hefur Maess ákveðið að stefna skipstjóra hraðbátsins, Marlin Lee Larsen, vegna meiðsla sem hann hlaut í slysinu. Hann meiddist á ökkla, fæti og handlegg en varla þarf að taka fram að báturinn hans varð einnig fyrir miklum skemmdum.
Sjálfur sagði Larsen að slysið hefði atvikast þannig að hann hefði setið þegar hann stýrði bátnum og ekki séð smábátinn. Þremenningarnir töldu sig hafa séð hann í símanum í þann mund sem áreksturinn varð. Maess hefur krafist þess að fá rúma 370 þúsund dali frá Larsen, 38 milljónir króna.
McMahon og Durham, sem fengu skurði og ofkælingu eftir að hafa farið í sjóinn, hafa ráðið lögfræðinga með það að marki að fara í mál.