Í nýrri skýrslu frá leyniþjónustu dönsku lögreglunnar, PET, kemur fram að hægriöfgamenn geti gripið til þess að ráðast á ákveðna trúarhópa, flóttamannamiðstöðvar, flóttamenn og innflytjendur. Ógnin, sem stafar af hægriöfgamönnum, hefur farið vaxandi og á ysta hægrivængnum eru aðilar sem eru reiðubúnir til að grípa til vopna til stuðnings málstað sínum.
Í skýrslunni kemur fram að þessi aukna hætta af hægriöfgamönnum sé ekki síst tilkomin vegna heitrar umræðu um flóttamannamál og útlendinga. Þetta eru hægriöfgamenn sem hafa svipaðar skoðanir og norski hryðjuverkamaðurinn Anders Behring Breivik.
PET telur að hjá fólki sem styður málstað hægriöfgamanna sé nú meira aðgengi að vopnum en áður og meiri vilji til að beita ofbeldi. Í skýrslunni kemur fram að frá 2015 hafi verið töluvert um hótanir, ofbeldi og árásir á flóttamenn, flóttamannamiðstöðvar, trúarhópa og pólitíska andstæðinga og hafi hægriöfgamenn verið að verki.
Sem dæmi er nefnt að maður hafi ekið sendiferðabifreið á hóp múslima við mosku í Lundúnum í júní á síðast ári og hafi hann samtímis hrópað: „Ég vil drepa alla múslima.“
Í Svíþjóð hefur oft verið reynt að kveikja í og kveikt í flóttamannamiðstöðvum og moskum og er einnig tæpt á því í skýrslunni.
Í Danmörku er það mat PET að hættan frá hægriöfgamönnum sé „takmörkuð“ en samt sem áður séu einstaklingar sem eru reiðubúnir til að úthella blóði fyrir pólitískan málstað sinn. Það sama á við um vinstri vænginn að mati PET. PET telur þó að hættan af vinstriöfgamönnum fari ekki vaxandi.
Þegar á heildina er litið telur PET að hryðjuverkaógnin sem steðjar að Danmörku sé „alvarleg“ en mesta hættan er talin stafa af öfgasinnuðum múslimum. Eins og staðan er í dag telur PET að í landinu séu einstaklingar sem hafa í „hyggju og hafa getu til“ að fremja hryðjuverk. Í samfélögum öfgasinnaðra múslima eru einstaklingar sem styðja hryðjuverkasamtökin sem kenna sig við Íslamska ríkið eða álíka hryðjuverkastamtök. Þessir einstaklingar geta að mati PET látið til skara skríða „með einföldum hætti og skömmum undirbúningstíma“.