Eldin Skoko, erlendur ríkisborgari fæddur árið 1987, hefur verið dæmdur í tveggja og hálfs árs fangelsi fyrir að nauðga íslenskri konu. Fæðingarland Eldin er ekki nefnt í dómnum en bæði fornafn og eftirnafn eru algeng nöfn í Bosníu. Atvikið átti sér stað í júlí í fyrra.
Í dómi sem féll í Héraðsdómi Vesturlands fyrir helgi kemur fram að Eldin hafi fundið konuna í annarlegu ástandi og ælandi utandyra. Hann hafi því næst tekið hana inn í hús þar sem hann dvaldist og lagt hana þar á bedda. Hann hafi því næst klætt hana úr öllum fötum, snert kynfæri hennar, sett fingur í leggöng hennar og farið ofan á hana og nauðgað. Konan gat enga mótstöðu veitt þar sem hún var máttlaus, með náladofa, átti erfitt með hreyfingar og mál og hafði ekki fulla meðvitund.
Í dómi er vitnað í réttarlæknisfræðilega skoðun konunnar og þar segir: „Vaknar við að hann er kominn upp í rúmið hennar og er nakinn og fer að hátta hana og hún gat ekki gert neitt því það var eins og allt rynni úr höndum hennar og væri ofur mjúkt. Svo hefur þessi maður samfarir við hana í leggöng. Minnir að svo fari hann. Hana minnir að hún nái að setjast upp og er nakin og heyrir að þar er annar maður og þeir eru að tala saman. Hún klæðir sig og hleypur út.“
Konan lýsti nánar aðdraganda þess að Eldin dró hana heim til sín. Hún hafði verið í partýi með vinum sínum um kvöldið og farið svo eftir miðnætti á skemmtistaðinn. Þar hafi hún drukkið fjóra bjóra en farið svo að finna fyrir ógleðitilfinningu og átt erfitt með að tjá sig.
„Hefði hún þá farið út í port við skemmtistaðinn og byrjað þar að æla, en einhver hefði svo komið aftan að henni og fært hana út fyrir utan portið. Hún hefði ælt þar nokkrum sinnum í viðbót, en því næst gengið ein þaðan og endað í innkeyrslu hússins við hliðina. Þar hefði hún setið ælandi en náð að hringja í móður sína. Brotaþoli sagði að maður hefði þá komið til hennar með pappír og þurrkað henni. Hann hefði svo tekið hana upp, með því að taka undir fæturna og bakið, og reynt að láta hana standa, en hún hefði ekki getað staðið sjálf. Maðurinn hefði svo haldið á henni inn í íbúðina á annarri hæðinni,“ segir í dómi.
Eldin bar fyrir sig að samræði þeirrra hafi verið með vilja hennar. Dómari taldi að framburður stúlkunnar hafi verið stöðugur, skýr og trúverðugur. Dómari benti á að Eldin hafi sjálfur sagt að stúlkan hafi verið mjög drukkin og því varla í ástandi til að veita samþykki sitt við ókunnugan mann:
„Loks bar vitnið B… um að brotaþoli hefði virst vera enn drukkin þegar hún fannst og illa áttuð. Með hliðsjón af þessum aðstæðum telur dómurinn ekki trúverðugan þann framburð ákærða að stúlkan hafi verið samþykk kynferðislegum samskiptum þeirra og hafi þar á meðal að fyrra bragði beðið hann um að setjast hjá hér á rúmið, farið að snerta hann, þar á meðal typpið á honum, og að þau hafi bæði verið að „kyssast og njóta stundarinnar.“ Er í því sambandi einnig litið til þess að ákærði kvaðst hafa leitt hugann að því meðan á þessu stóð hvort hún væri meðvituð um það sem hún væri að gera.“
Líkt og fyrr segir var Eldin Skoko dæmdur í fangelsi í tvö ár og sex mánuði og er dómurinn óskilorðsbundinn. .
