Rannsókn lögreglu er lokið á meintri morðtilraun erlends manns að nafni Mohamed, sem kallar sig Josh, en hann er grunaður um að hafa reynt að drepa íslenska fyrrverandi kærustu. Landsréttur úrskurðaði hann í gæsluvarðhald til 31. janúar í gær.
Í dómi Landsréttar kemur fram að Mohamed sé grunaður um að hafa á heimili sínu í Meðalholti tekið fyrrverandi sambúðarkonu sína kyrkingartaki og þrengt að öndunarvegi hennar þar til hún missti meðvitund. Skýrsla Sebastian Kunz réttarmeinafræðings liggur fyrir en hann skoðaði áverka konunnar.
„Áverkar þolandans eru sambærilegir við beitingu kyrkingartaks með miklu afli, sem mögulega leiddi til meðvitundarleysis. Þar sem kyrking með höndum er margbrotin í eðli sínu, verður að flokka aflmikla kyrkingu með höndum eins og í þessu tilviki, sem a.m.k. mögulega lífshættulega,“ segir í niðurlagi skýrslunnar.
Líkt og DV greindi frá stuttu eftir atvikið er hann grunaður um að hafa villt á sér heimildir. Vinkona þolanda hans sagði þá: „Hann þykist heita Eljoven en er kallaður Josh og vera fæddur 1995 til 1993 (fer eftir við hvern hann talar) en hann heitir Mohamed og er fæddur 1989. Hann var með falsað vegabréf þangað til um helgina sem lögreglan er komin með í hendurnar svo hann hefur verið mjög sannfærandi.“
Í dómi Landsréttar kemur fram að þó rannsókn á meintri morðtilraun sé lokið þá sé enn rannsakað hver hann er í raun og veru. „Rökstuddur grunur leikur á að hann hafi gefið rangar upplýsingar til yfirvalda þegar hann kom til landsins árið 2012,“ segir í dómi.