Enn hefur ekkert spurst til 36 ára norskrar konu, Janne Jemtland, tveggja barna kvæntrar móður, síðan hún yfirgaf heimili sitt í Brumunddal þann 29. desember síðastliðinn.
Fjölmennt leitarlið hefur leitað hennar undanfarna daga en án árangurs. Hefur meðal annars verið notast við þyrlur, hunda, dróna, snjósleða en auk þess hefur fjölmennur hópur leitarfólks leitað fótgangandi á jörðu niðri.
Hvarfið þykir sérstaklega dularfullt enda yfirgaf Janne heimili sitt í skjóli nætur. Blóð úr henni fannst í tvígang, með um eins og hálfs kílómetra millibili, skömmu eftir að leit hófst en síðan þá hefur ekkert fundist.
Í tilkynningu sem norska lögreglan sendi frá sér í morgun kemur fram að enginn hafi stöðu sakbornings varðandi hvarfið. Þá hafi ekki fundist meira blóð. Rannsóknin heldur þó áfram af fullum krafti og hefur lögreglan í Brumunddal fengið aðstoð Kripos, norsku ríkisrannsóknarlögreglunnar.
Lögregla hefur fengið fjölmargar ábendingar undanfarna daga, eða um tvö hundruð talsins, og er unnið úr þeim samkvæmt forgangsröðun. Veður á svæðinu hefur gert lögreglu og leitarmönnum lífið leitt. Mjög kalt hefur verið í veðri í Noregi undanfarna daga og frost farið víða niður í 15 gráður. Þá hefur snjóað mikið á svæðinu.
Hvarf Janne hefur valdið íbúum Brumunddal hugarangri, en íbúar í þessum litla bæ, rúma hundrað kílómetra norður af Osló, eru rétt um tíu þúsund talsins.
Fyrr um kvöldið hafði Janne verið í jólaboði ásamt eiginmanni sínum í samkomuhúsi í Brumunddal. Komið hefur fram að Janne hafi virst hress og ekki með sérstakar áhyggjur af neinu. Hún fór heim til sín um kvöldið en yfirgaf heimili sitt aftur um klukkan tvö aðfaranótt 29. desember.
Síðan er eins og jörðin hafi gleypt hana. Leit heldur þó áfram og hefur lögregla ekki gefið upp alla von um að komast að því hvað gerðist þetta örlagaríka kvöld undir lok síðasta árs.