Össur útskýrði á brókinni mögulega hræðileg örlög Eyþórs Arnalds

Mynd: DV ehf / Sigtryggur Ari

Össur Skarphéðinsson, fyrrverandi utanríkisráðherra, segir á Facebook-síðu sinni að í gær hafi hann fáklæddur í búningsklefa útskýrt fyrir Eyþóri Arnalds, einum eiganda Morgunblaðsins, að það væru hræðileg örlög að leiða Sjálfstæðisflokkinn í Reykjavík. Stuttu síðar kom í ljós að Eyþór hygðist bjóða sig fram í prófkjöri flokksins.

„Í dag stóð ég á brókinni í búningsklefa í World Class og útskýrði með litríkum hætti að hræðilegustu örlög í stjórnmálum heimsins væru að vinna leiðtogaprófkjör Sjálfstæðisflokksins í Reykjavík. Glæsilegur maður á besta aldri, Eyþór Arnalds, spurði mig kurteislega hvernig á því stæði? Ég útskýrði að sá einstaklingur væri dæmdur til að leiða minnihluta í borgarstjórn Reykjavíkur næstu fjögur árin og ömurlegra og valdaminna hlutskipti væri ekki hægt að hugsa sér. „Akkúrat,“ sagði útgefandi Morgunblaðsins, og virtist örlítið huxi,“ skrifar Össur.

Eftir dágóða stund í gufubaði uppgötvaði Össur að Eyþór ætlaði að bjóða sig fram í prófkjörinu. „Þegar ég kom svo vel marineraður úr gufubaði hálfu kílói síðar var náttúrlega það fyrsta sem ég heyrði að Eyþór Arnalds hefði gefið kost á sér í leiðtogasætið. – Ég hef einsett mér að segja aldrei: „I told you so!“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.