Í apríl 2017 mættust Anthony Joshua og Wladimir Kiltschko í hnefaleikum og fór bardaginn fram á Wembley í Lundúnum. Craig Forster var einn þeirra fjölmörgu sem greiddi 19,95 pund fyrir að sjá bardaganna í sjónvarpi en það var Sky sem átti útsendingarréttinn. Hann bauð síðan vinum sínum að horfa á bardagann með sér. Einn vinanna gerði Forster þó mikinn óleik og fylltist Forster örvæntingu þegar málið fór að vinda upp á sig.

Þegar útsendingin hófst tók vinurinn spjaldtölvu Forster og beindi henni að sjónvarpinu og sýndi það sem sást á sjónvarpsskjánum í beinni útsendingu á Facebook. Rúmlega 4.000 manns nýttu sér þessa „útsendingu“ hans á bardaganum án þess að greiða nokkuð fyrir. Sunday Mirror skýrir frá þessu.

Fram kemur að Sky hafi rekið útsendinguna til Forster og hafi í framhaldinu sent honum himinháan reikning eða upp á 85.000 pund en það svarar til um 12 milljóna íslenskra króna. Reikningurinn er byggður á þeirri upphæð sem Sky telur sig hafa orðið af vegna útsendingar vinar Forster á bardaganum. Talið er að rúmlega 400.000 manns hafi horft á bardagann á Facebook og þannig hafi Sky orðið af miklum tekjum.

„Þeir eru að setja fordæmi með máli mínu. Ég veit að það var rangt að streyma bardaganum. Ég stoppaði ekki vin minn því ég var að horfa á leikinn. Ég er bara maður sem fékk sér nokkra drykki með vinum.“

Forster sagði að hann hefði fengið nokkur bréf frá lögmannsstofunni sem sér um málið fyrir Sky. Í einu þeirra var honum boðið að ljúka málinu með sátt og greiða 5.000 pund, sem svarar til rúmlega 700.000 íslenskra króna, til að sleppa við að málið færi fyrir dóm. Hann sagðist hafa greitt þetta í örvæntingu sinni til að ljúka málinu.

Nú sér hann hins vegar eftir að hafa greitt þetta og ætlar að mæta Sky í dómssal og reyna að fá peningana aftur þar sem hann hafi beðist afsökunar og að um ölvunarrugl þeirra félaga hafi verið að ræða.