Flugfreyjum og flugþjónum, sem eru í hlutastarfi hjá Icelandair, hafa verið settir afarkostir að þeirra mati. Fólkið þarf að velja á milli þess að fara í fullt starf frá og með 1. janúar 2019 eða missa vinnuna. Formaður Flugfreyjufélagsins segir þetta vera gróft brot á kjarasamningi og sé mikið áfall. Forstjóri Icelandair, Bogi Nils Bogason, segir að 118 flugfreyjum og flugþjónum í hlutastarfi verði boðið fullt starf. Ef það boð verði ekki þegið verði gengið frá starfslokum nema sérstakar ástæður séu fyrir hendi.

Vísir.is skýrir frá þessu. Þar er haft eftir Boga að þetta eigi ekki við um þá sem hafa unnið hjá Icelandair í 30 ár eða lengur eða eru orðnir 55 ára. Öðrum verði boðið að fara í fullt starf. Haft er eftir honum að launakostnaður sé hár hér á landi í samanburði við samkeppnisaðila Icelandair á alþjóðlegum markaði og það verði að bregðast við því. Þessi aðgerð sé liður í að lækka þennan kostnað.

Haft er eftir Berglindi Hafsteinsdóttur, formanni Flugfreyjufélags Íslands, að þetta sé mikið áfall fyrir marga og verið sé að setja fólki afarkosti.