Fréttablaðið skýrir frá þessu í dag. Fram kemur að í bréfi frá Samkeppniseftirlitinu komi fram að þar sem Guðmundur sé aðaleigandi Brims og nú forstjóri HB Granda geti það leitt til brota á samkeppnislögum. Guðmundur tók við forstjórastarfinu í júní í kjölfar þess að hann keypti kjölfestuhlut í fyrirtækinu.
Einnig kemur fram í bréfinu að það geti leitt til samkeppnisbrota að Guðmundur sitji í stjórn Vinnslustöðvarinnar í Vestmannaeyjum og sé um leið aðaleigandi Brims. Guðmundur gekk úr stjórn Vinnslustöðvarinnar í vor og seldi þriðjungshlut sinn í fyrirtækinu í gær.
Samkeppniseftirlitið telur einnig að hugsanlega hafi tilkynningarskyldur samruni átt sér stað þegar Brim eignaðist hlut í HB Granda en þetta hafi ekki verið tilkynnt til eftirlitsins. Sömuleiðis hafi tilkynningarskyldur samruni hugsanlega átt sér stað 2016 þegar Brim keypti Ögurvík.
Niðurstaða liggur ekki fyrir í málinu.