Erlendir fjárfestar höfðu skráð sig fyrir 45 milljónum evra í skuldabréfaútboði WOW air í gærkvöldi. Vonast er til að útboðinu ljúki í dag og að þá hafi tekist að fá fjárfesta til að leggja rúmlega 50 milljónir evra í útboðið.

Fréttablaðið skýrir frá þessu í dag. Blaðið hefur eftir heimildarmönnum að Skúli Mogensen, eigandi WOW air, fái fjárfesti inn í flugfélagið og muni hann leggja því til hlutafé upp á tugi milljóna evra um leið og skuldabréfaútboðið verður klárað. Ekki er vitað hversu stóran hlut fjárfestirinn fær í staðinn í félaginu.

Um mitt ár var eiginfjárhlutfall WOW air aðeins 4,5 prósent og eigið fé um 20 milljónir Bandaríkjadala.