Margir hafa fengið svikapósta, sem hafa verið sendir út í nafni Netflix, undanfarna daga. Póstarnir snúast um að Netflix sé í vandræðum með innheimtuupplýsingar viðtakandans og því þurfi hann/hún að uppfæra greiðslukortaupplýsingar sínar. Um tölvupósta er að ræða sem eru sendir til fólks óháð hvort það er með áskrift að Netflix.

Í tilkynningu frá Valitor segir að svikaupplýsingarnar séu settar fram í þremur skrefum. Fyrsta skrefið er sjálfur tölvupósturinn en skref tvö og þrjú eru síðurnar hjá „Netflix“ sem eru ekki hjá Netflix heldur hjá síður sem heitir bizalmo.se.

Fólk ætti að forðast að opna þennan tölvupóst og ekki smella á hlekkina sem honum fylgja ef það opnar tölvupóstinn á annað borð. Síðan á auðvitað alls ekki að gefa upp neinar greiðslukortaupplýsingar. Ef fólk hefur gengið í gildruna er það hvatt til að hafa samband við greiðslukortafyrirtæki strax.