Fulltrúar stjórnvalda funduðu vegna stöðu WOW air um helgina. Fulltrúar fjögurra ráðuneyta vinna nú að viðbragðsáætlun sem á að grípa til ef mikilvæg fyrirtæki verða fyrir áföllum í rekstri og hefur WOW gjarnan verið nefnt til sögunnar í því samhengi. Forsvarsmenn fyrirtækisins vinna nú hörðum höndum að því að verða félaginu úti um 50 milljóna dollara fjármögnun.
Morgunblaðið skýrir frá þessu í dag. Segist blaðið hafa heimildir fyrir fundarhöldum helgarinnar innan úr stjórnarráðinu. Sigtryggur Magnason, aðstoðarmaður samgönguráðherra, vildi ekki staðfesta að fundað hefði verið um helgina. Morgunblaðið segir að stjórnvöld vænti þess að fá fréttir af skuldabréfaútgáfu WOW air á morgun, þriðjudag.
