Gunnar Kristinn Þórðarson, formaður Karlalistans og oddviti í Reykjavík, hafnar því alfarið að hann hafi eytt meirihluta uppvaxtar síns á Barna og unglingageðdeild Landspítalans.
Hann segir að Þórey Guðmundsdóttir, prestur, fyrrverandi- sáttarfulltrúi sýslumanns og fyrrverandi starfsmaður barnaverndar, fullyrðir þetta í athugasemd um hann. Hann segir að hið rétta sé sé hann hafi verið á BUGL í tvo mánuði.
Þetta kemur fram í fréttatilkynningu vegna svokallaðra Femínistaskjala sem eiga að sýna fram á hvernig þjóðþekktir femínistar séu að „undirbyggja aðför gegn nafngreindum feðrum“
Gunnar Kristinn segir að Þórey hafi látið þessi orð falla í Facebook-hóp þar sem herferð þeirra er gagnrýnd. „Þórey Guðmundsdóttir, prestur og fyrrum sáttarfulltrúi sýslumanns og fyrrum starfsmaður barnaverndar, fullyrðir í athugasemd að oddviti Karlalistans hafi eytt meirihluta uppvaxtar síns á Barna og unglingageðdeild Landspítalans. Svo lítilmannleg er umræðan að leitað er til barnsæsku forsvarsmanna feðrahreyfinga til að finna óhróður og slúður til áfellis og mannorðsminnkunnar. Vill undirritaður koma því á framfæri að hann þurfti að þiggja þjónustu Barna og unglingageðdeildar Landspítalans fyrir 30 árum, eftir erfiða baráttu við einelti og taugasjúkdóminn Tourette’s Syndrome, og lagðist inn í 2 mánuði til hvíldar og greininga,“ segir Gunnar Kristinn.
Hann segir að þessi orð séu aðför gegn þeim börnum sem þurfa að sækja þjónustu á BUGL: „Telur Karlalistinn að umræðan sé aðför gegn öllum þeim börnum sem sækja þjónustu til Barna og unglingageðdeildar, þar sem þeir geta nú átt von á því að opinberir starfsmenn með aðgang að trúnaðarupplýsingum noti slíkar upplýsingar gegn þeim, ef þeir taka þátt í opinberri umræðu, -jafnvel 30 árum síðar. Samfylking og Vinstri græn styðja slíka orðræðu.“