Brynjar Níelsson þingmaður Sjálfstæðisflokks sendir tóninn Degi B. Eggertssyni vegna götuþrenginga víða um borgina í færslu sem hann birtir á Facebook nú í kvöld. Þrengingarnar eru flestar í þeim tilgangi að minnka ökuhraða í íbúahverfum. Í færslunni líkir hann þrengingunum við ofbeldi gagnvart borgarbúum og virðist draga í efa hlýnun jarðar vegna loftlagsbreytinga.

„Ekki er nóg að láta sitja á hakanum allar nauðsynlegar umbætur á umferðarmannvirkjum heldur er enn verið að þrengja götur borgarinnar til að gera borgarbúum erfitt að ferðast á milli staða í einkabílum. Ef vinstri meirihlutinn heldur að það verði til þess að fólk hætti að keyra og noti almenningsvagna þá er það mikill misskilningur.“ skrifar Brynjar og heldur svo áfram: „Það gerist ekki meðan foreldrar þurfa að fara með yngri börnin á leikskóla, þau eldri í skólann og síðan í íþróttir og tómstundir út um hvippinn og hvappinn á öllum tíma dags. Og það í ekki betra veðurfari en hér er. Hnattræna hlýnunin, sem að vísu enginn verður var við, dugar ekki einu sinni.“

Hann líkur svo færslunni á eftirfarandi orðum:

„Það er alveg hægt að bæta almenningssamgöngur án þessa ofbeldis gagnvart borgarbúum.“