Birgir Örn Guðjónsson, lögreglumaður, nútímafræðingur og frambjóðandi í 2. Sæti Bæjarlistans í Hafnarfirði var nýlega á ferð í Póllandi. Þar heimsótti hann meðal annars hinar alræmdu útrýmingarbúðir nasista í Auschwitz og segist breyttur og betri maður eftir þá heimsókn.
Biggi var ásamt fleiri lögreglumönnum á námskeiði í Póllandi. Dvöldu þeir þrjá daga í bænum Oswiesim (pólska nafnið á þýska nafninu Auschwitz) sem er bærinn þar sem hinar alræmdu útrýmingarbúðir Auschwitz voru á tímum seinni heimstyrjaldarinnar.
„Það er óhætt að segja að maður komi breyttur maður frá því að dvelja á þessum slóðum, grafa sig í söguna og heimsækja búðirnar þar sem þessi hryllingssaga var skrifuð,“ segir Biggi í stöðufærslu á Facebook. „Að reyna að skilja hvernig svona getur gerst. Hvernig gat venjulegt fólk tekið þátt í svona hryllingi? Hver voru skrefin? Hvernig gat venjulegur maður eins og ég og þú komið heim og kysst börnin sín á ennið eftir vinnudag sem snérist um að drepa jafnaldra þeirra eins og hverja aðra skepnu? Þó þetta virki fjarlægt þá er þetta samt svo nærri.“
Biggi segir námskeið vissulega hafa verið á slæmum tíma, en hann ásamt flokksfélögum sínum og öðrum frambjóðendum stendur í kosningabaráttu fyrir sveitarstjórnarkosningarnar sem verða næsta laugardag, 26. maí, en hann segir heimsóknina hafa gert sig að betri manni með víðari sýn og aukinn skilning.
„Um það snýst þetta. Að hafa áhrif á samfélagið. Áhrif til góðs. Það er svo nauðsynlegt að við skiljum söguna til að geta haft áhrif á framtíðina.“