Margir muna eftir stóra kjólamálinu þar sem netheimur skiptist í tvennt yfir hvaða liti augað nam á mynd af kjól sem dreift var á félagsmiðlum. Síðustu daga hefur upptaka farið manna á milli þar sem hlustendur heyra karlmanns rödd ýmist segja Yanny eða Laurel.
Það voru upphaflega grunnskólaneminn Katie Hazel í Flowery branch grunnskólanum í Georgíu sem uppgötvaði klippuna. Hún hafði fundið hana á síðunni Vocabulary.com, þar sem hún leitaði að orðinu Laurel en þegar hún spilaði upptökuna heyrði hún ekki annað en að röddin segði Yanny. Hún spilaði upptökuna svo fyrir bekkjarfélaga sína sem skiptust í tvo hópa; annar heyrði Yanny og hinn Laurel.
Vinur hennar Fernando Castro setti svo upptökna á Instagram-síðu sína og annar félagi þeirra tengil á upptökuna á Reddit. Stuttu seinna setti Chloe nokkur Feldman upptökuna á Twitter-aðgang sinn ásamt könnum um hvort nafnið hlustendur heyrðu. Feldman er vinsæl á Youtube þar sem hún á um 610.000 fylgendur svo klippan fékk í kjölfarið mikla dreifingu. Vinahópar og starfsstaðir hafa svo skipst í tvennt yfir því hvað fólk heyrir.
En nú er semsagt svarið komið, upptakan er af nafninu Laurel. Hún var gerð af óperusöngvara en Marc Tinkler, framkvæmdastjóri Vocabulary.com, vill ekki láta nafn hans getið. Hann gefur það þó upp til gamans að eigandi raddarinnar hafi verið í upphaflega leikhópnum í söngleiknum Cats eftir Andew Lloyd Webber.