Flugfélagið WOW Air mun byrja að fljúga til Indlands í byrjun næsta árs. Verður Nýja Delí fyrsti áfangastaður flugfélagsins í Asíu. Flugtíminn verður rúmlega 10 klukkutímar í beinu flugi frá Keflavík.

Athygli vekur að verðið á ódýrustu flugmiðunum er ekki í takt við flugtímann, kostar ferðin aðra leið rúmar 20 þúsund indverskar rúpíur eða rúmar 30 þúsund íslenskar krónur. Sum flug kosta meira eða rúmar 51 þúsund krónur á núverandi gengi. Á þetta aðeins við WOW Basic, þeir sem vilja taka með sér ferðatösku þurfa að greiða rúmar 60 þúsund krónur.

Þeir sem vilja aðeins það besta, mikið pláss á löngu flugi og tvær töskur til að fylla af indverskum gersemum þurfa að greiða rúmar 86 þúsund krónur.

Þýðir þetta að fyrir fjögurra manna fjölskyldu á leið til Nýju Delí, með fótaplássi og ferðatöskur fyrir alla, kostar ferðin fram og til baka rúmar 600 þúsund krónur.

WOW Air verður með fyrsta lággjaldaflugfélagið sem býður upp á beint flug á milli Indlands og Evrópu. Indverska lággjaldaflugfélagið Indigo Airlines hefur áður auglýst áform sín um lággjaldaflugferðir til Evrópu en svo virðist sem að WOW Air muni ná forskoti á þeim markaði.

Fjórar breiðþotur af gerðinni Airbus 330-900 munu bætast við flugflota WOW Air síðar á árinu en félagið á í dag þrjár Airbus A330-300. Ekki er vitað hvaða gerð af breiðþotum verður notuð í Asíufluginu.