Skarphéðinn Guðmundsson, dagskrárstjóri RÚV, segist gera fastlega ráð fyrir því að breytingar verði gerðar á forkeppni Eurovision hér á landi fyrir næsta ár. Ísland hafnaði sem kunnugt er í neðst sæti í sínum riðli í undanúrslitunum í liðinni viku.
DV greindi frá því í gær að heildarkostnaður við framleiðslu forkeppninnar og þátttöku Íslands í keppninni hafi numið 90 milljónum króna. Er það svipuð upphæð og í fyrra. Inni í þeim kostnaði eru þátttökugreiðslur til EBU, tæknikostnaður á Íslandi, ferðakostnaður og laun þátttakenda. Sagði Skarphéðinn að útlit væri fyrir að verkefnið kæmi til með að standa undir kostnaði.
Í samtali við Morgunblaðið í dag segir Skarphéðinn að burtséð frá framlaginu og árangrinum í ár þá sé venjan sú að gera upp hverja keppni fyrir sig með það fyrir augum að gera betur. Engin breyting verði þar á og allt ferlið verði skoðað; allt frá vali á lögum og flytjendum yfir í listræna útfærslu.
„Aðalatriðið er að vera með en þetta er jú keppni og þegar við erum að taka þátt í keppni hljótum við að vilja ná sem bestum árangri og þar setjum við okkur það markmið að komast í úrslit,“ segir Skarphéðinn við Morgunblaðið og bætir við að lokum: „Mér finnst mjög líklegt að við gerum einhverjar breytingar án þess að ég geti sagt núna hversu yfirgripsmiklar þær verða.“