„Er þessi kjóll ekki óvenjulega fleginn? Ekki að ég hafi eitthvað á móti því, þetta er bara athugasemd,“ sagði Gísli Marteinn Baldursson, Eurovision-kynnir, um einn af kynnunum í Eurovision-útsendingunni í gærkvöld. Viðhafði hann síðan svipaða athugasemd um aðra konu. Ummælin hafa vakið blendin viðbrögð og farið fyrir brjóstið á einhverjum.
Í Facebook-hópnum Feministaspjallið er þetta tekið til umræðu og samtals 53 ummæli eru undir stöðufærslu þar sem vakin er athygli á athugasemdum Gísla. Flestum þátttakendum í umræðunni þótti þetta fremur leiðinlegar athugasemdir og sumir vilja fara að skipta um Eurovision-kynni.
Taktlaus, óþörf og leiðinleg athugasemd eru meðal einkunna sem þessi ummæli sjónvarpsmannsins fá. Ein kona bendir á að Gísli hafi sagt þetta um tvær konur sem klæddust flegnum kjólum í útsendingunni og því hafi varla verið um tilviljun og slysni að ræða. Önnur kona telur að Gísli sé of hvatvís. Einn þáttakandi í umræðunum bendir þó á að konurnar hafi vissulega verið í óvenjulega flegnum kjólum. Aðrir þátttakendur ítreka að athugasemdirnar hafi verið fullkomlega óþarfar engu að síður.