Guðmundur Ellert Björnsson, starfsmaður Barnaverndar Reykjavíkur, hefur verið ákærður fyrir ítrekuð og langvarandi kynferðisbrot gegn börnum og nauðganir. Hann er samtals ákærður fyrir brot gegn fjórum börnum og einhverfum manni. Þetta kemur fram í gæsluvarðhaldsúrskurði yfir honum sem Landsréttur staðfesti á mánudaginn.

Guðmundur Ellert er ákærður fyrir að hafa í fjölmörg skipti á tímabilinu 1998 til 2004 eða 2005, brotið á pilti sem þá var sex til tólf ára gamall. Hann er ákærður fyrir að hafa í fjölmörg skipti á tímabilinu 2004-2010 brotið á öðrum pilti sem þá var sjö til þrettán ára. „Fólust kynferðismökin meðal annars í að fróa þeim auk munnmaka og endaþarmsmaka hvað A varði,“ segir í dómi.

Þá er Guðmundur Ellert ákærður fyrir að hafa í eitt skipti, á tímabilinu 2005 til 2008, nauðgað stúlku sem þá var sjö til tíu ára. Auk þess er hann ákærður fyrir að hafa brotið á pilti sem þá var þrettán eða fjórtán ára, á árunum 2002 eða 2003. Hann er ákærður fyrir að hafa nýtt sér yfirburði sína gagnvart börnunum og traust þeirra  og trúnað er hafði verið trúað fyrir þeim til kennslu og uppeldis. „Brotin áttu sér jafnan stað þegar börnin gistu í rúmi ákærða á heimili hans en í nokkrum tilvikum á öðrum vettvangi,“ segir í dómi.

Guðmundur Ellert er enn fremur ákærður fyrir að hafa nauðgað einhverfum pilti tvívegis, fyrst árið 2005 og svo árið 2006. Af ákæru að dæma hefur pilturinn verið orðinn lögráða þegar brotin áttu sér stað. Líkt og börnin gisti pilturinn í rúmi ákærða þar sem Guðmundur Ellert þvingaði hann til munnmaka og endaþarmsmaka.

Guðmundur Ellert neitar sök og krafðist þess að gæsluvarðhaldskröfu yrði hafnað. Hvorki Héraðsdómur Reykjaness né Landsréttur samþykktu það.