Wales Online skýrir frá þessu. Fram kemur að parið hafi eytt háum fjárhæðum í kaup á ýmsum varningi á borð við fatnað, Gucci sólgleraugu, töskur og í ferðalög. Mark keypti sér líka Audi RS4. Þau ferðuðust meðal annars til Amsterdam, Alicante, Parísar og Dubai.
Í september á síðasta ári barst lögreglunni ábending um að parið hefði óhreint mjöl í pokahorninu og var þá gerð húsleit á heimili þeirra. Þar fann lögreglan 110 grömm af kókaíni. Sími Mark var haldlagður og við rannsókn á honum fundust textaskilaboð sem tengdu hann við fíkniefnaviðskipti.
Emily var í námi og vann hlutastarf í matvöruverslun en samt sem áður gat hún eytt miklum fjármunum í allskonar lúxusvarning. Andrew Taylor, saksóknari, sagði fyrir dómi í Cardiff að hún hafi elskað lúxuslífið. Taylor sagðist telja að Mark hafi þénað ótrúlegar fjárhæðir á 18 mánuðum á því að selja rúmlega þrjú kíló af kókaíni.
Taylor notaði myndir af Instragram í málflutningi sínum og sagði þær sanna að litlar tekjur parsins hafi ekki verið í neinu samræmi við lífsstíl þeirra.
Þegar lögreglan leitaði heima hjá Emily fannst dýr fatnaður, skartgripir, úr, töskur og skór að heildarverðmæti sem nemur um 5 milljónum íslenskra króna. Hún neitaði að vita nokkuð um kókaínviðskipti Mark og sagðist halda að hann starfaði í byggingarvinnu. Að lokum játaði hún þó að hafa vitað að hann seldi fíkniefni. Hún var dæmd í 15 mánaða fangelsi en Mark var dæmur í sjö ára fangelsi.
