Ný uppgötvun hefur orðið til þess að vísindamenn eru farnir að efast um tilvist lífvera á fjarlægum hnöttum, hugsanlega geti það verið að við jarðarbúar séu einu lífverurnar í alheiminum.

Uppgötvunin er að efnið fosfór er ekki jafn algengt í alheiminum og áður var talið. Fosfór er lífsnauðsynlegt ef svo má að orði komast þar sem lífverur geta ekki verið til án þess, til dæmis þarf fosfór til að mynda DNA.

Fosfór verður til í sprengistjörnum, fram til þessa var talið að fosfór yrði til í öllum sprengistjörnum en svo virðist ekki vera ef marka má nýja rannsókn frá Háskólanum í Cardiff sem kynnt var á ráðstefnu í Liverpool í vikunni. Til þess að mynda fosfór þarf alveg sérstaka sprengistjörnu og við á jörðinni erum svo heppin að fosfór úr nálægri sprengistjörnu rataði hingað.

Það þýðir að líkurnar á að fosfór rati á plánetur sem henta til lífs eru minni en áður og því gætum við þurft að leita lengi eftir lífi annarsstaðar í alheiminum.