Karlmaður í Virginíu í Bandaríkjunum varð að aðhlátursefni á netmiðlum eftir að lögregla birti myndband af óheppilegu atviki sem varð á dögunum.
Þannig er mál með vexti að manninum, hinum þrítuga Isaac Bonsu, var gert að stöðva bifreið sína af lögreglu fyrir skemmstu. Isaac vissi sem var að hann væri í vondum málum, enda var hann undir áhrifum fíkniefna og auk þess með marijúana í fórum sínum. Reyndi hann því það sem fáum tekst; að hlaupa undan lögreglu.
Þegar Isaac áttaði sig á því að öll sund væru lokuð ákvað hann að fara út úr bílnum og reyna að flýja á tveimur jafnfljótum. Eðli málsins samkvæmt var hann á hraðferð, svo mikilli hraðferð að hann gleymdi að setja bifreið sína í það kallað er „park“ – á slæmri íslensku.
Isaac áttaði sig ekki á þessu og þegar hann hljóp fram fyrir bílinn varð hann fyrir honum. Eftirleikurinn fyrir lögreglu var auðveldur og var hann handtekinn andartaki síðar. Sem betur fer varð Isaac ekki meint af byltunni og var hann fluttur, óslasaður, á lögreglustöð.
Hann á þó yfir höfði sér ákæru fyrir akstur undir áhrifum fíkniefna og fyrir að reyna að flýja undan laganna vörðum.
ICYMI: Have you seen our latest in-car video capturing a man trying to escape our officers, but his plan gets foiled when he’s hit by his own car? ? Check out the footage! #FCPDStrangerCalls pic.twitter.com/fSbDts61R1
— Fairfax County Police (@fairfaxpolice) March 7, 2018