Íslensk kona, fædd árið 1992, hefur verið ákærð fyrir sérstaklega hættulega líkamsárás en henni er gefið að sök að hafa ráðist á aðra konu á skemmtistaðnum Bjarna Fel í mars árið 2015. Samkvæmt ákæru réðst hún á hina konuna með því að rífa í hár hennar og draga hana þannig niður í gólfið.
Á gólfinu veittist sú ákærða á hina konuna með því að slá og sparka í höfuð hennar og háls allt með þeim afleiðingum að hún missti meðvitund og hlaut mar á vinstra heilahveli, brot á málbeini, einkenni heilahristings og dreifða yfirborðsáverka í andliti.
Konan sem fyrir árásinni krefst tæplega 700 þúsund króna í miska- og þjáningabætur auk lögmannsþóknunar að fjárhæð 250 þúsund króna. Málið verður tekið fyrir í Héraðsdómi Reykjavíkur þann 16. mars næstkomandi.