Lögreglan á höfuðborgarsvæðinu hafði í nógu að snúast í gærkvöld og nótt og fangageymslurnar í Hverfisgötu voru fullsetnar.
Klukkan hálf tvö var minniháttar fíkniefnaframleiðsla í Breiðholti stöðvuð. Þar fundust þrjár fullvaxta plöntur, efni og búnaður. Málið var afgreitt á staðnum
Klukkan hálf fjögur var tilkynnt um líkamsárás í vesturbæ Reykjavíkur og einn aðili var fluttur á slysadeild með áverka á höfði. Lögregla telur sig vita hver veitti honum áverkana.
Klukkan hálf fimm hafði lögregla afskipti af ofurölvi pilt fyrir utan skemmtistað í miðbænum. Hann var ósjálfbjarga og var færður í fangamóttöku. Á honum fundust fíkniefni og sökum ástands var hann færður í fangageymslu.
Rétt fyrir klukkan fimm í nótt brutust út slagsmál í miðbænum. Karlmaður neitaði að fara að fyrirmælum lögreglu og var handtekinn í kjölfarið. Hann dvelur nú í fangageymslu og verður yfirheyrður í dag.
Laust fyrir miðnætti var ökumaður stöðvaður í umdæmi lögreglunnar í Hafnarfirði/Garðabæ. Hann var grunaður um akstur undir áhrifum fíkniefna og í bílnum fundust neysluáhöld. Honum var sleppt að lokinni blóðtöku.
Klukkan tæplega hálf þrjú var bifreið stöðvuð í umdæmi lögreglustöðvar númer 4 (Mosfellsbær/Grafarvogur/Árbær). Mikil kannabislykt fannst í bílnum og farþegi bifreiðarinnar framvísaði efnunum. Ökumaðurinn var ekki undir áhrifum.
11 aðrir ökumenn voru stöðvaðir í nótt, grunaðir um annað hvort ölvun eða fíkniefnaneyslu undir stýri. Þar að auki var einn tekinn fyrir of hraðan akstur. Hann keyrði á 113 km/klst hraða þar sem hámarkshraðinn var 60. Bifreiðin reyndist auk þess ótryggð og voru skráningarnúmerin tekin af henni.
