Brotist var inn í húsnæði fjölmiðlafyrirtækisins Hringbrautar á Eiðistorgi á Seltjarnarnesi um helgina og stolið var öllu steini léttara nema útsendingartölvunni. Samkvæmt heimildum DV var þjófurinn eða þjófarnir með lykil, en upp komst um málið þegar starfsfólk mætti til vinnu eftir helgi. DV fékk þær upplýsingar hjá Hringbraut að þetta hafi verið mikið áfall fyrir starfsfólk, teknar hafi verið tölvur, tölvuskjáir, harðir diskar og myndavélar. Hringbraut heldur úti sjónvarpsstöð, vefmiðli og útvarpsstöð á tíðninni 89,1.

Hafliði Helgason framkvæmdastjóri Hringbrautar segir í samtali við DV að málið sé nú í höndum lögreglu: „Okkur tókst að halda úti útsendingu í gær, en það urðu einhverjar seinkanir á dagskránni. En við erum samheldinn hópur og okkur mun takast að vinna okkur út úr þessu saman.“