Tveir íslenskir karlmenn voru handteknir í Árósum í Danmörku aðfaranótt 19.september síðastliðinn eftir slagsmál brutust út á krá í bænum. Annar mannanna er sagður hafa ráðist á barþjón eftir að hafa innbyrt rammsterkt áfengi og mislíkað bragðið. TV 2 greinir frá þessu ásamt fleiri dönskum miðlum. Mennirnir eru sagðir vera 44 ára og 35 ára.

Fram kemur að í upphafi hafi 44 ára gamall maður stillt sér upp við barinn ásamt þremur öðrum Íslendingum og pöntuðu þeir svokallað chiliskot. Fram kemur í grein TV2 að áfengið sem um ræðir rífi vel í flesta og hafi gífurlega sterkt eftirbragð.

Fram kemur að einn af vinum mannsins hafi reiðst heiftarlega og ráðist á barþjóninn eftir að hafa innbyrt skotið vegna þess að áfengið var svo sterkt á bragðið. Dyravörður á staðnum er sagður hafa gripið inn í og tekið að sér að henda manninum út en á meðan hafi hinn 44 ára gamli Íslendingur ráðist á annan dyravörð á staðnum. Er hann sagður hafa dregið dyravörðinn út þar sem hann yfirbugaði hann og sparkaði margsinnis í líkama hans og andlit.

Íslenski vinahópurinn flúði þvínæst af vettvangi en mennirnir tveir sem um ræðir voru handteknir tíu mínútum seinna eftir að tilkynning barst lögreglu.

Eldri Íslendingurinn er ákærður fyrir líkamsárás á meðan hinn yngri er kærður fyrir að hafa valdið óspektum. Í frétt TV2 kemur fram að enginn af Íslendingunum fjórum sé búsettur í Danmörku.

Í samtali við TV2 segir Jakob Christiansen fulltrúi lögreglunnar á Austur-Jótlandi að „hópur vel drukkinna Íslendinga“ hafi verið staddur á kránni þegar atvikið átti sér stað og hafi síðan komið upp „einhvers konar ósætti.“