Lögreglan á höfuðborgarsvæðinu hefur upplýst rán sem hún hafði til rannsóknar. Þann 12. september síðastliðinn var greint frá því a ráðist hefði verið á eldri konu á heimili hennar og henni veittir áverkar.
Tilkynningu lögreglu fylgdi að svo virtist sem tveir karlmenn hefðu vitað að þar væru verðmæti að finna og höfðu þeir á brott með sér talsvert magn af skartgripum.
Í tilkynningu frá lögreglu segir að málið teljist nú að fullu upplýst en tveir karlmenn á fertugsaldri voru handteknir vegna málsins. Einn karlmaður og tvær konur voru einnig handteknar vegna gruns um að hafa veitt þýfi móttöku. Eitthvað af skartgripunum var endurheimt, að sögn lögreglu.