Utanríkisráðherra Norður-Kóreu harðorður í garð Donalds Trumps
Ri Yong-ho, utanríkisráðherra Norður-Kóreu, segir að Donald Trump Bandaríkjaforseti hafi með ummælum sínum lýst yfir stríði við land sitt. Þetta sagði Ri í við blaðamenn við höfuðstöðvar Sameinuðu þjóðanna í New York í dag.
RI sagði að Norður-Kóreumenn áskilji sér rétt til að skjóta niður bandarískar orrustuþotur, hvort heldur sem þær væru í norðurkóreskri lofthelgi eða ekki. Sagði hann að heimsbyggðin mætti ekki gleyma því að Bandaríkjamenn hefðu lýst yfir stríði, ekki Norður-Kóreumenn.
Grunnt hefur verið á því góða milli ríkjanna tveggja og hafa eldflauga- og kjarnorkutilraunir Norður-Kóreumanna hleypt illu blóði í bandarísk yfirvöld og nágrannaþjóðir Norður-Kóreu; Suður-Kóreu og Japan þá einna helst.
Donald Trump Bandaríkjaforseti sagði á Twitter um helgina, eftir að Ri hafði ávarpað allsherjarþing Sameinuðu þjóðanna í New York, að hvorki Ri né Kim Jong-un, einræðisherra landsins, yrðu til staðar mikið lengur ef þeir halda áfram hótunum sínum.
Ri sagði við blaðamenn í dag að „í ljósi stríðsyfirlýsingar Donalds Trumps“ væru allir möguleikar uppi á borðinu hjá stjórnvöldum í Pyongyang.