Komst í gegnum skoðun þrátt fyrir alvarlega bilun: 17 ára drengur var undir stýri á Hellisheiði þegar hjólabúnaðurinn gaf sig

„Hann hefði getað stórslasast. Eða dáið“

Líkt og sjá má er næsta skoðun í janúar 2018.
Umrædd bifreið Líkt og sjá má er næsta skoðun í janúar 2018.
Mynd: Úr einkasafni Hugrúnar

„Hann hefði getað stórslasast. Eða dáið,” segir Hugrún Ásta Óskarsdóttir. Þann 30. ágúst síðastliðinn lenti 17 ára sonur hennar í alvarlegu atviki á Hellisheiðinni. Vinstri hjólabiti bifreiðarinnar, sem hefur það hlutverk að halda dekkjunum á sínum stað, gaf sig með þeim afleiðingum að vinstra afturhjólið nánast brotnaði af. Drengurinn slapp með skrekkinn en hann náði að sveigja út af veginum, í tæka tíð, og stöðva úti í kanti. Hugrún gagnrýnir harðlega að bíllinn, sem fór síðast í skoðun í maí, hafi fengið skoðun með svo alvarlega bilun. Hún segir Frumherja, sem sá um skoðunina, bera ábyrgð á óhappinu.

Sonur Hugrúnar var hætt komin eftir að alvarleg bilun kom upp í nýkeyptri bifreið sem hann ók. Bíllinn hafði nýlega fengið skoðun hjá Frumherja hf. og segir Hugrún Ásta að skoðunarfyrirtækið beri ábyrgð á óhappinu.
Hallgrímur Stefánsson og Hugrún Ásta Óskarsdóttir Sonur Hugrúnar var hætt komin eftir að alvarleg bilun kom upp í nýkeyptri bifreið sem hann ók. Bíllinn hafði nýlega fengið skoðun hjá Frumherja hf. og segir Hugrún Ásta að skoðunarfyrirtækið beri ábyrgð á óhappinu.
Mynd: Brynja

Virtist í toppstandi

Bifreiðina, sem er af gerðinni Hyundai Tucson, árgerð 2005, keypti Hugrún, fyrir son sinn, á Facebook-síðunni Brask og brall í byrjun júlí á þessu ári. Hugrún vandaði valið við kaupin þar sem sonur hennar stundar nám á höfuðborgarsvæðinu, en þau eru búsett í Hveragerði. Hann þarf því að keyra yfir Hellisheiði á hverjum degi til að komast í skólann. „Þetta virtist vera bíll í toppstandi. Það var búið að gera mikið við hann en það sem skipti mestu máli var að bíllinn var síðast skoðaður, hjá Frumherja á Dalvegi, í mars 2017. Bíllinn fékk boð í endurskoðun og í maí var græni miðinn fjarlægður og bifreiðin fékk fulla skoðun. Auðvitað gerir maður sjálfkrafa ráð fyrir að nýskoðaðir bílar séu í góðu standi,” segir Hugrún, en eftir að bíllinn var dreginn á verkstæði kom í ljós að grindin var öll sundurryðguð.

Ryðgaður í sundur.
Vinstri hjólabitinn Ryðgaður í sundur.
Mynd: Úr einkasafni Hugrúnar

„Bíll á alls ekki að fá skoðun þegar ástandið er svona“

Hallgrímur Stefánsson, viðgerðarmaður hjá MS vélar og stálsmíði í Hveragerði, sem skoðaði bílinn eftir að mæðginin komu með hann á verkstæðið, staðfesti í samtali við DV að vinstra afturhjólið hafi nánast verið dottið undan bílnum. Þá rétt hékk hægri hjólabitinn uppi en var við að fara í sundur. „Þetta sést mjög vel og er eitt af þeim atriðum sem á að yfirfara þegar bifreið er skoðuð. Bíll á alls ekki að fá skoðun þegar ástandið er svona. Hvað þá að vera á götunni. Í þessu ástandi var hann ekkert annað en dauðagildra.“ Hallgrímur er þess fullviss að það taki ryðgun sem þessa marga mánuði að myndast. Þá telur hann allar líkur á því að þegar bíllinn var skoðaður í vor þá hafi bitarnir þegar verið orðnir mjög götóttir. Þá strax hefði átt að taka bifreiðina úr umferð.

Hér sést gatið í gegnum grindina hægra megin að framanverðu.
Hjólagrindin Hér sést gatið í gegnum grindina hægra megin að framanverðu.
Mynd: Úr einkasafni Hugrúnar

Hallgrímur kallaði svo til skoðunarmann frá Frumherja sem myndaði bílinn í bak og fyrir á meðan hann var enn á verkstæðinu í Hveragerði. Hugrún kveðst enn vera mjög reið vegna atviksins og finnst skrítið að hafa ekkert heyrt frá Frumherja þrátt fyrir að hafa sent ótal skilaboð vegna málsins. „Ég vil að einhver svari fyrir þetta. Þá langar mig að vita af hverju fólk er skyldað til að láta skoða bílana sína, og borga fyrir það háar upphæðir, ef stórhættulegum bílum er hleypt í gegn.“

Í þessu ástandi var hann ekkert annað en dauðagildra.

Mannleg mistök

Karl Svavar Sigurðsson, sviðstjóra hjá Frumherja, staðfestir í skriflegu svari til DV að umrædd bifreið hafi verið skoðuð í mars og sett hafi verið út á fjölda atriða. „Oft getur verið erfitt að koma auga á tæringu þar sem burðarvirkið getur tærst innan frá og út eins og í þessu tilviki. Einnig var til að mynda óvenju snjóþungt í mars og getur snjór og ísing á undirvagni hafa villt fyrir,“ segir Karl Svavar. Að hans sögn harmar fyrirtækið þessa yfirsjón í mars og verður þetta mál notað til þess að hnykkja enn betur á skoðunarferlinu til að koma í veg fyrir að ökutæki sem þetta komist í gegnum skoðun.

„Fyrirtækið er með gæðaeftirlitskerfi sem tekur á skoðunarferlinu í heild sinni.
Þetta eru mannleg mistök og verður aldrei hægt að koma algjörlega í veg fyrir slíkt. Hins vegar tekur gæðakerfið á svona yfirsjónum og er fræðsla, upplýsingagjöf og eftirfylgni hluti af því ferli sem sett hefur verið í gang. Starfsmenn Frumherja hf. eru í sambandi við eiganda og ökumann bifreiðarinnar og munu leiða málið til lykta með þeim,“ segir Karl Svavar.

Viltu lesa meira? Þú getur strax lesið þessa grein og aðrar í heild sinni hér á DV.is með því að ýta á „Sjá meira“ og nýta þér hagstæða áskriftartilboð frá aðeins 928 kr. á mánuði.
Sjá meira »
Gleymt lykilorð?
Auglýsing

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.